Китаптың исем туйына саҡырабыҙ

Ҡәҙерле дуҫтар, әҙәбиәт һөйөүселәр! Һеҙҙең барығыҙҙы ла 23 февраль Яңы Собханғол ауылы мәҙәниәт йортонда үтәсәк яҡташыбыҙ, талантлы йәш шағирә Айгөл Йәмилева – Ғәбитованың “Дауылдан һуң” исемле шиғырҙар китабының исем туйына саҡырабыҙ. Рәхим итегеҙ!

Йәмилева (Ғәбитова) Айгөл Илгиз ҡыҙы 1994 йылдың 9 февралендә Бөрйән районының Яңы Собханғол ауылында тыуған. Бәләбәй ҡалаһының Башҡорт гимназия-интернатын тамамлаған, М. Аҡмулла исемендәге БДПУ-ла уҡыған. Шиғриәткә, әҙәбиәткә иртә килә – бала саҡтан шиғырҙар һәм хикәйәләр ижад итә. Беренсе шиғырҙар йыйынтығын гимназия йылдарында – “Илһам шишмәләре – 2011” төбәк-ара шиғриәт фестиваленә сығарҙы. Студент йылдарынан республика баҫмалары менән әүҙем хеҙмәттәшлек итә – “Шоңҡар”, “Ағиҙел” журналдарында, “Йәшлек”, “Башҡортостан”гәзиттәрендә баҫыла. 2016-2018 йылдарҙа-“Башҡортостан” республика ижтимағи – сәйәси гәзитенең штаттан тыш хәбәрсеһе; 2018-2021 йылдарҙа-“Башҡортостан”республика ижтимағи-сәйәси гәзитенең әҙәбиәт һәм мәҙәниәт бүлеге хәбәрсеһе. 2020 йылдан әлеге ваҡытҡа тиклем – “Аҡбуҙат” республика балалар журналының бүлек мөдире.

2016 йылда “Әҙәби нағыш”китабы сиктәрендә “Ямғыр вальсы” исемле тәүге шиғырҙар йыйынтығы, 2019 йылда З. Биишева исемендәге “Китап” нәшриәтендә ” Йәш тауыштар ” серияһында “Ҡапма-ҡаршылыҡтар”шиғырҙар китабы донъя күрҙе. 2021 йылда “Шағир мөхәббәте”исемле шиғырҙарының аудиоальбомын сығарҙы.