Белем иленә сәйәхәт
2 сентябрь Аҫҡар ауыл китапханаһында мәҙәниәт хеҙмәткәрҙәре менән берлектә башланғыс класс уҡыусылары өсөн “Белем иленә сәйәхәт” исемле бик күңелле сара ойошторолдо. Балаларҙа мәктәпкә ҡарата ҡыҙыҡһыныу уятыу, китапҡа ҡарата һөйөү тәрбиәләү, уйындар аша уларҙың ижади һәләтен үҫтереү маҡсатында эшләнде был мауыҡтырғыс сара. Кескәйҙәр тылсымлы белем иленә Буратино, Мальвина, Незнайка менән бергәләшеп сәйәхәткә юлландылар. Юлда уларҙы төрлө-төрлө һынауҙар көтөп кенә торҙо. Буратино юғалтҡан асҡысты табыу өсөн балаларға яратып уҡыған әкиәттәре буйынса һорауҙарға яуап табырға, йомаҡтар сисергә кәрәк ине. Зирәк, отҡор кескәйҙәр барлыҡ ауырлыҡтарҙы ла үтеп Белем иленә аяҡ баҫтылар. Балалар бигерәктә “Портфель йыйыу”, ”Һанды тап!” уйындарын яратып уйнанылар. Белем көнөнә арналған был сара барыһына ла бик оҡшаны.