26 ноябрь Әсәйҙәр көнөнә арналған “Ер биҙәге – сәскәләр, ил биҙәге – әсәләр!”  исемле әҙәби – музыкаль кисә үтте. Байрам кисәһенә район ҡатын-ҡыҙҙары ойошмаһы етәксеһе Р. Салауатова, “Берҙәм Рәсәй” партияһының район бүлексәһе сәрҡәтибе  Г.Йомағолова һәм район хәрби комиссариатынан Ф.Ҡаһарманова килде. Байрамды асҡандан һуң,  Р.Салауатова сығыш яһап, ауыл ҡатын-ҡыҙҙарын матур байрам менән ҡотланы.  Артабан башланғыс класс  уҡытыусыһы  Иркә Фәйзуллина ауыл ҡатын-ҡыҙҙарының тормош-көнкүреше миҫалында, ауылдағы һуңғы утыҙ йыл эсендәге бөтә әсәләрҙе лә айырмай телгә алып, тамашасыларҙы хәтирәләргә бирелдереп төплө сығыш яһаны. Унан сәхнәгә герой-әсәләр саҡырылды, улар менән “Әсә һәм бала” темаһына әңгәмә ойошторолоп,  йәш әсәләргә теләктәре, кәңәштәре тыңланды.  Кисә моңло йыр, дәртле бейеү, нәфис һүҙ менән аралашып барҙы.  Байрамға “Өй ҡояшы һин-Әсәй!” исемле китап күргәҙмәһе эшләнде.     Аш-һыу конкурсына буҙа, бәлештәр  әҙерләп килтергән  ҡатын-ҡыҙҙарға , райондан килгән вәкилдәр бүләктәр тапшырҙы. Кисәгә килеүселәр  тәмле бәлештәр менән сәй, буҙа эсеп таралышты.