Башҡорт теле – туған телем

14 декабрь — Башҡорт теле көнө. Бөйөк мәғрифәтсе Мифтахетдин Аҡмулланың тыуған көнө айҡанлы билдәләнгән был көн телебеҙгә хөрмәт, киләсәк быуынға тапшырыласаҡ изге аманат булып тора. Башҡорт теле көнө райондағы китапханаларҙа төрлө саралар менән билдәләнде. Китап күргәҙмәләре, тематик кисәләр, әңгәмәләр, мәғлүмәт сәғәттәре, викториналар, башҡа төрлө акциялар китапханаға ҡатнашыусыларҙы йыйҙы.

Әтек ауылы китапханаһында, Башҡорт теле көнөнә арналған «Башҡорт уйыны» өҫтәл уйыны үтте. Тел өйрәнеү өсөн өҫтәл уйыны – киң таралған һәм отошло алым. Уйын ярҙамында һәр кемде телде өйрәнеүгә йәлеп итергә мөмкин. Беренсенән бындай уйындар башҡорт телен өйрәтеүҙә, уларҙың телмәр байлығын артырыуҙа ҙур ярҙамсы. Икенсенән, милли мөхит, мәҙәниәтебеҙ менән таныштыра һәм йәнле аралашыу ҙа ул.

Башҡорт теле көнөнә ҡарата Әбделмәмбәт ауыл китапханаһында «Эй, илһамлы, эй, хөрмәтле, башҡорт теле» исемле шиғриәт минуттары үтте.

Балаларҙа башҡорт теленә, мәҙәниәтенә ҡыҙыҡһыныу уятыу, туған тел менән ғорурланыу тойғоһо һәм телгә ҡарата һөйөү тәрбиәләү, телебеҙҙең матурлығын, байлығын күрһәтеү маҡсатында Байназар ауылы китапханасыһы Буранбаева Гөлсиә Фаил ҡыҙы  башҡорт теле һәм әҙәбиәте уҡытыусылары Баязитова Р. Р., Исмәғилова Н. С. менән берлектә мәктәп уҡыусылары өсөн «ӘЮЯ ҡаласығына сәйәхәт» исемле мауыҡтырғыс сара үткәрҙеләр.

Сара Башҡорт теле көнөнөң ҡасан һәм ни өсөн барлыҡҡа килеүе тураһында һөйләшеүҙән башланды. Артабан уҡыусылар 2 командаға бүленеп көс һынаштылар. Улар 9 урамдан торған квест-уйынында, башҡорт теленең үҙенсәлектәре тураһындағы төрлө ҡыҙыҡлы һорауҙарға яуап биреп, тел тураһында мәҡәл-әйтемдәр белеүҙәрен, төрлө билдәле шәхестәрҙе һәм башҡорт теленең тарихын ҡулланып төрлө урамдағы һынауҙарҙы үттеләр. Һорауҙар һәм уйындар менән үрелеп барған сара ҡыҙыҡлы һәм фәһемле үтте. Уҡыусыларҙың башҡорт телен яҡшы белеүе, әүҙемлеге, ихласлығы, телгә битараф булмауҙары беҙҙе ҡыуандырҙы.

Ҡотан ауылы китапханасыһы Ғәҙелшина Эльвира Фәнил ҡыҙы  Ырғыҙлы урта мәктәбенең 10-11 синыф уҡыусылары өсөн башҡорт телен белеүҙе яҡшыртыуға йүнәлтелгән «Әлләсе» уйыны үткәрҙе.

Нәби ауылы китапханасыһы мәҙәниәт хеҙмәткәрҙәре менән берлектә Башҡорт теле көнөнә арналған “Алтын тирмә” интеллектуаль уйыны үткәрҙеләр. Уйында ике команда «Өс таған» һәм «Бирешмә» командалары көс һынашты. Ярышта ҡатнашыусылар үҙ командалары менән таныштырҙылар, бер — береһен сәләмләнеләр һәм сараның төп өлөшө — тапҡырлыҡты, зирәклекте, отҡорлоҡто һынауҙа, халҡыбыҙҙың аң — белемен, даирәһен киңәйтеүсе уйын — кисә «Алтын тирмә» һынауҙары аша белемдәрен күрһәттеләр. Ауыр ғына һорауҙар булыуға ҡарамаҫтан командалар һорауҙарҙы яуапһыҙ ҡалдырманылар.Көсөргәнешле уйында дуҫлыҡ еңде.

Яуымбай ауыл китапханаһы мәҙәниәт йорто менән берлектә, Башҡорт теле көнөнә арналған «Эй, илһамлы, эй, хөрмәтле, башҡорт теле!» исемле әҙәби кисә үткәрҙе. Китапханасы Кинйәкәева Разия Искәнйәр ҡыҙы, әҙәби кисәне Зәйнәб Биишеваның матур, йөрәктәргә үтеп инерлек шиғыр юлдары менән башлап ебәрҙе. Кисәлә ҡатнашыусылар үҙҙәренең белемдәрен төрлө өлкәлә һанап ҡаранылар.»Ыласындар» һәм «Бөркөттәр» командалары «Мәҡәлде уҡып ҡара», кроссворд сисеү, һүҙ төҙөү, «Мәҡәлдең яртыһын тап» уйындарында әүҙем ҡатнаштылар. Шулай уҡ мәҙәниәт йортоноң художество етәксеһе Мырҙағолова Зөлфирә Вара ҡыҙы үткәргән «Мәңге йәшә, башҡорт теле!» викторинаһына, йомаҡ ҡойоуға һәм тиҙәйткес әйтеүгә ихлас ҡушылдылар.

 

Иҫке Собханғол урта мәктәбенда китапханасы Ҡасимова Ә. Ф.  7В синыф уҡыусылары менән «Туған тел» исемле әҙәби сәғәт ойошторҙо. Сараның маҡсаты — киләсәк йәш быуында башҡорт теленә һөйөү уятыу, туған телдең ниндәй бай һәм бөйөк булыуын аңлатыу. Әңгәмә башында Әлфиә Фәрғәт ҡыҙы сығыш яһап, уҡыусыларҙы телдең һаҡсылары булырға саҡырҙы, телегеҙҙе яратығыҙ, ҡәҙерләгеҙ, һаҡлағыҙ, телде ҡәҙерләгән кеше ҡәҙерле булыр, тине. Сараның икенсе өлөшөндә уҡыусыларға  «Әлләсе» уйыны тәҡдим ителде.