Яулыҡтарҙа халҡым тарихы
1 февраль – Бөтә донъя яулыҡ көнө. Яулыҡ ябыныу тарихы бик тәрәндә. Ул бик күп халыҡтарҙың, дини йүнәлештәрҙең, шул иҫәптән ислам диненең дә төп атрибуты, сағыу бер өлөшө булып тора. Яулыҡ ҡатын-ҡыҙға матурлыҡ ҡына түгел, тыйнаҡлыҡ, бөхтәлек, баҫалҡылыҡ өҫтәй, һаҡлаусы ҡалҡан булып тора. Ҡотан ауылы китапханаһында “Аллы-гөллө шәл- яулығым” исемле кисә үткәрелде. Китапханасы Эльвира Фәнил ҡыҙы яулыҡтың тарихына байҡау яһап, боронғо француз, кешмир яулыҡтар тураһында асыҡлабыраҡ һөйләп үтте. Ҡатын-ҡыҙҙар алып килгән шәл-яулыҡтар араһында ниндәйе генә юҡ – күп төрлөлөктән, матурлыҡтан яһалған күргәҙмәнән күҙҙәр ҡамашыр. Лариса Абдуллинаның “Яулыҡ баҙары”, Зөлфиә Ханнанованың “Яулыҡ” шиғырҙары аша, башҡорт халыҡ ижады – мәҡәлдәр аша яулыҡҡа мәҙхиә йырланды.
Кисәнең икенсе өлөшөндә Айһылыу Миңлеғәле ҡыҙы Ноғоманова яулыҡ ябыныу буйынса оҫталыҡ дәресе күрһәтте.